Mannleg og hlýleg hlið Bessastaða. Er forsetafrúin sextán eða er hún nær fimmtugu - eða er hún orðin fimmtug?

Segi ykkur það að hún kemur sífellt á óvart þessi elska.

Man þá tíð er hún tiplaði á tánum - með stjörnur í augunum - nýlega orðin húsmóðir að Bessastöðum, kallandi úr eldhúsinu;

"Óli, Óli .. Hvar ertu Óli?"

Sé í minningunni Forseta okkar labba inn í eldhúsið með bros á vör sem hefði hæft vel í áttina að sextán ára yfirspenntum ungling sem var að fara að taka sinn fyrsta ökutíma - en ekki húsmóður lands og þjóðar.

"Já Dorrit mín, ég er hér"..

"Óli, heldur þú að það sé ekki í lagi að taka afgangana af skötuselnum og setja í frost ef hann klárast ekki allur á eftir? Hann er svo bragðgóður, hreinasta lostæti!"

Málið var nefnilega að háæruverðugur var staddur við eldavélina í eldhúsi Bessastaða og var að steikja skötusel í kókosolíu, eitthvað sem mér finnst algert konfekt - og greinilega frú Dorrit líka. Hún hafði komið inn í eldhúsið með eitt ljúfasta og hreinasta bros sem ég hef nokkurn tíman séð á einhverjum sem í raun tilheyrði "elítunni" en ekki almúganum, boy was i wrong að halda að hún liti stórt á sig og væri snobbhænsn...

Ólafur gekk að forsetafrúnni, tók blíðlega um mitti hennar og þrýsti henni hlýlega að sér..

"Jú Dorrit mín, það er ekkert mál að setja eitthvað í frost ef eitthvað verður eftir" sagði hann og brosti blikkandi til kokksins .. sem steinlá fyrir þessum tveim ljúfu manneskjum sem að mati kokksins hafa fært steingeldan fjaðraskrautsbæ nær fólkinu í landinu með því að vaða yfir ákveðnar hefðir og reglur - forsetaembættið sjálft er komið nær fólkinu í landinu en það hefur nokkurn tíman verið.

P.s. megnið af samtali þeirra fór fram á ensku en með íslensku ívafi.

Dorrit: Ísland verði svalari útgáfa af Dubai

Það rofar til, sólin hækkar á lofti og birtan er lofandi í pólitíkinni líka. Geir H. Haarde - gangi þér vel í baráttu þinni í þínum veikindum!

Þá er vonandi martröðinni að ljúka. Stóran hluta lífs míns hefur þessi martröð haldið heljartaki á nánast öllu sem einhverju skiptir máli á Íslandi, en von mín er sú að núna fari að birta til og góð verk fari núna loks að líta dagsljósið - góð verk til handa heimilunum og fólkinu í landinu - en ekki góðverk til handa skyldmennum, frændgarði og félögum flokksmanna.

Eitt af því sem mér hefur fundist einna mesta martröðin í gegnum tíðina eru stöðuveitingar sem hafa farið af hendi Sjálfstæðisflokksins til handa skyldmennum og úr frændgarði Davíðs Oddsonar. Hversu siðblindir og hliðhollir flokksmenn DO hafa verið í gegnum tíðina er óskiljanlegt. Undarlega fáránlegt að fylgjast með hverjum á fætur öðrum Davíð tengdum koma með alls skyns afsakanir og útskýringar á því hvers vegna þeir skipuðu þessum frændgarði í embættin þrátt fyrir að mun hæfari einstaklingar hafi verið til staðar til að ganga í þessi embætti..

Nei, sem betur fer sér nú fyrir enda slíkra stöðuveitinga - ljóskan sem varð forsætisráðherra - löngu eftir að hún barði í borðið og sagði að hennar tími myndi koma - mun taka á þessum málum og gera hlutina gegnsærri.

Undarlegt er líka hversu lengi þjóðin hefur látið það viðgangast að slíkar stöðuveitingar voru leyfðar án þess að lyfta svo mikið sem litla fingri til að mótmæla svo einhverju skipti.

Ég hef fulla trú á að Jóhanna á eftir að gera ýmislegt gott á þeim stutta tíma sem ríkisstjórn hennar mun starfa og óska ég henni alls þess besta í því hrikalega erfiða verkefni sem ríkisstjórn VG og Samfylkingar eiga nú eftir að glíma við. Næsta víst er að það er skelfingarástand sem þau eru að taka við - bú sem langvarandi stjórnarseta sjálfstæðismanna hefur nú loks skilað af sér - en því miður bara í rjúkandi rústum einum saman.

Geir Hilmar Haarde - fráfarandi forsætisráðherra óska ég alls þess besta í baráttu sinni við þau veikindi sem hann nú glímir við. Það er heldur ekkert smámál sem hann blessaður þarf að glíma við núna á því sviðinu. En ég er á því að fyrst hann er að hverfa af vettvangi stjórnmálanna og líklega stefnir í harða valdabaráttu á toppi sjálfstæðisflokksins - þá hafi það verið í allra heilla þágu að svo fór sem fór - að sjálfstæðisflokkurinn skuli hafa dottið út úr ríkisstjórn landsins.

Nú getur sjálfstæðisflokkurinn rifið kjaft, klórað í mótherja sem og samherja - barist um feita stóla innan eigin flokka og verið á nippinu - í friði og ró án þess að það bitni á vitlausum aðilum.

Fráfarandi ríkisstjórn kveður

Brilljant, nú er bara að vona að fyrstu verkin verði seðlabankahreinsun - og svo björgunarleiðangrar heimilanna í landinu.

Ragna Árnadóttir, settur ráðuneytisstjóri dóms- og kirkjumálaráðuneytisins verður ráðherra málaflokksins í nýrri ríkisstjórn.

Tíu ráðherrar verða í nýrri ríkisstjórn Samfylkingar og vinstrihreyfingarinnar græns framboðs, þar af tveir utanþingsráðherrar.

Auk Rögnu sest Gylfi Magnússon, dósent við HÍ í stjórnina. Hann verður viðskiptaráðherra.

Af hálfu Samfylkingar setjast í ríkisstjórnina:

Jóhanna Sigurðardóttir, forsætisráðherra, Kristján L. Möller verður samgönguráðherra, Össur Skarphéðinsson verður iðnaðarráðherra og utanríkisráðherra og Ásta Ragnheiður Jóhannesdóttir verður félags- og tryggingamálaráðherra.

Af hálfu VG setjast í ríkisstjórnina Steingrímur J. Sigfússon, hann verður fjármála-, landbúnaðar- og sjávarútvegsráðherra, Katrín Jakobsdóttir verður menntamálaráðherra, Kolbrún Halldórsdóttir, umhverfisráðherra og Ögmundur Jónasson, heilbrigðisráðherra.

Steingrímur J. Sigfússon verður staðgenginn forsætisráðherra. Þá verður Kolbrún Halldórsdóttir samstarfsráðherra Norðurlandanna.

MBL.IS ...

Ragna Árnadóttir dómsmálaráðherra

Heilög Jónanna hefur allt í hendi sér. Hvernig stendur á því að Heilög þrenning í Seðlabankanum heldur sig ofaní rottuholunum sínum án skítkasts á hluti líðandi stunda?

Nei, næsta víst er að kerlingin er ekki heilög sem slík - enda hefur hún sjálf einmitt sagt það öfuga - að hún sé langt frá því að vera heilög. En samt er hún eins heilög og hægt er að verða - innan raða fjöldans í þingheimi öllum. Vinnudýr í krafti heiðarleika og samviskusemi - vinur litla mannsins.

Ég hef alltaf verið hrifinn af Jóhönnu Sigurðardóttur.

Alveg frá því ég man eftir mér hefur hún einhvern veginn verið - eins og ég las einhvers staðar nú um daginn - andlit heiðarleika og eljusemi gagnvart þeim sem minna mega sín. Þó hef ég ekki alltaf verið fylgjandi henni, en ég er það í dag og er það von mín að þessi stjórn - VG og Samfylkingar með stuðningi Framsóknar - muni gera góða hluti þá daga sem hún hefur nú til að ráða.

 

Nei, þetta er ekki Jóhanna Sig.

Þetta er ímynd sjálfstæðisflokksins, flokkur sem er orðin ellihrumur göngugrindargarpur - já - ellikerling hefur náð því að krækja duglega í flokkinn. Ég hef reyndar aldrei farið leynt með að ég hef aldrei - og mun aldrei - verða sjálfstæðismaður.

Þegar Davíð Oddsson kom í landsmálapólitíkina fóru margir af mínu fólki úr Sjálfstæðisflokknum og hétu því að koma ekki aftur að pólitík fyrr en Landspabbi væri farinn aftur úr pólitík - DO er ennþá í pólitíkinni og heldur heljargreipum sínum fast í göngugrindina sína.

Hver fautinn á fætur öðrum hefur svo hoppað uppúr holu í kringum harðstjórann og hvert spillingarmálið af öðru hefur birst í kringum þennan harða karl.

Næst væri að nefna allar þær stöðuveitingar sem fram hafa farið í valdi sjálfstæðisflokksins.

Frændi DO, Vinur DO, Sonur DO ...

Hvaða tauma hefur Davíð Oddsson haldið í á bakvið tjöldin svo "óhæfari" einstaklingar honum skyldir eða tengdir hlutu störf sem hæfðu öðrum umsækjendum MUN betur? Ekki segja mér að þeir sem skipuðu í stöðurnar hafi bara í heimsku sinni ákveðið að óhæfara fólk væri betur í stöðunum komið en mun hæfari...

Fólk sem talið hefur verið langt um fremri en þessir aðilar hafa þurft að lúta í lægra vegna þess að það var ekki í rétta partýinu og þekkti ekki rétta fólkið.

En, vonandi er nú séð fyrir endan á svona spilltum embættisveitingum.

"Gegnsætt og Uppi á borðinu" er slagorð sem ég hef trú á að væntanleg ríkisstjórn Jóhönnu Sigurðardóttur muni vinna eftir. Ef einhverjum er treystandi til að hafa allt á borðinu - líka það sem er óþægilegt - þá er það Heilagri Jóhönnu!

Jóhönnustjórnin tekur við undir kvöld

Er sjálfstæðismönnum sama hverju er fórnað - eingöngu með það í augum að þeir komist aftur að valdastólum sínum? Vil kjósa menn en ekki flokka .. gömul lumma!

Það er aumkunarvert að fylgjast með því þegar stjórnmálamenn kunna ekki að taka ósigri eins og menn. Það er aumt þegar þeir byrja að ausa frá sér drullu og skít, rífa menn og málefni niður og vita ekki hvar þeir eiga að stoppa - og í raun sýna loks sitt rétta viðmót og andlit.

Einar Guðfinns ætti sýst að vera með grjótkast úr sínum glerturni. Maður sem reynir á síðustu metrum veru sinnar í ráðherrastól - að veiða sér atkvæði í komandi kosningum með því að heimila hvalveiðar án þess að bera það undir kóng eða prest - eða kannski er þetta búið að vera í startholunum lengi en tímasetningin hafi verið valin af yfirmanni og meistara hans - Davíð Oddsyni.

Hvað eru sjálfstæðismenn að reyna að segja? Það kemur þeim væntanlega "óþægilega" á óvart hve langan tíma stjórnarmyndunarviðræðurnar taka - enda er það þeirra heitasta ósk og von að allt gangi óraunverulega hratt fyrir sig - svo hratt að sem flest gleymist að skoða - svo "nýja" stjórnin geri sem flest mistökin og sem flest gangi á afturfótunum - svo þeir geti staðið uppi sigri hrósandi með látum sagt; "Sko, ykkur er nær skríll - þetta vilduð þið - ykkur var nær að bola okkur burt!"...

Þeim er sem sagt algerlega sama þó vel sé vandað til verka hérna - þeim er sama hversu miklu þarf að fórna - þeir hafa bara áhuga á að öllum öðrum mistakist svo þeir komist aftur í feitu stólana sína...

**********

Hvað finnst fólki um það að toppar banka og stórra fyrirtækja séu að yfirfæra eignir sínar á eiginkonur eða ættingja? Er það ekki hrein og klár ávísun til þess að þeir hafi sannarlega gert eitthvað misjaft - að þeir hafi eitthvað að fela? Eru þeir ekki með þessum verknaði að segja að þeir hafi gert eitthvað sem þolir ekki dagsljósið og eigi þar með á hættu að missa eignir sínar?

Þeir sem hafa hreint mjöl í pokahorninu og hafa staðið heiðarlega að öllum sínum verkum - hafa ekkert að fela og ættu ekki að þurfa að missa neitt - þannig að svona verknaður segir í raun og veru ekkert annað en að hér sé maðkur í mysunni. Vonandi verður þetta rannsakað mjög gaumgæfilega langt niður í kjölinn.

**********

 Mér finnst að á þessum tímamótum ætti að fara fram ákveðin hreinsun í stjórnmálunum. Við ættum að nota næstkomandi kosningar til að taka á gömlum stjórnmálamönnum sem eru löngu orðnir barn síns tíma og eru orðnir ekkert annað en dragbítur á ferskum og óspilltum stjórnmálum.

Við ættum að nota okkur rétt okkar og strika út nöfn velflestra "toppa" allra flokka. Það þarf miklu meira af ungu og efnilegu fólki inn í forystu flokkanna - það þarf fólk sem er meira meðvitað um nútímann! Við þurfum ferskt fólk framtíðarinnar og koma fólki fortíðarinnar frá. Reyndar finnst mér að líftími pólitíkusa ætti ekki að vera mikið meiri en tíu ár - og þá ættu þeir að stíga til hliðar fyrir fólki sem er ungt og kemur með ferskar hugmyndir og áherslur sem hæfa hverjum tíma fyrir sig.

**********

Over and out - farinn í sund og svo á gönguskíði ... eða þannig.

Þreifingar milli flokkanna byrjuðu fyrir löngu

Gallar og kostir hvalveiða. Skiptir ímynd út á við einhverju máli þegar kreppa og atvinnuleysi er alls ráðandi?

Mér er ennþá nógu hlýtt til ímyndar okkar útávið - til að vera á móti hvalveiðum. Mér finnst það hin mesta skelfing að fara út í það að skerða ímynd okkar enn meira en þegar er komið. Auðvitað þurftu sjálfstæðismenn að stimpla sig út úr áratuga niðurrifsstarfssemi gegn landi og þjóð - með því að bjóða uppá það að ýmsar þjóðir heims fari í "hvalastríð" gegn okkur ...

Á hinn bóginn er það spurning um hvort við eigum að láta álit og aðgerðir annarra stoppa okkur í því að nýta auðlindir okkar til sjávar. Nú þegar hart er í ári og atvinnuleysi er að aukast svo skelfilega - er það kannski spurning um líf og dauða margra í landinu að fá þessar veiðar núna.

Gaman væri að vita það afdráttalaust, svart á hvítu - hver er gallinn og hver er kosturinn - á þessum blessaða hval.

Hverjir eru kostirnir við að leyfa hvalveiðar - og hverjir eru gallarnir. Hverjir væru kostirnir við að banna hvalveiðar og hverjir væru gallarnir....

Hægt að draga hvalveiðileyfi til baka

Sjálfstæðisflokkurinn hríðskelfur af óttablandinni virðingu fyrir Karlinum með svipuna...

Skósveinar Davíðs eru fáir, sauðtrúir og algerlega blindir á galla hans. Þeir snúast eins og hvolpar í kringum gamla einræðisforingjann. Ég átti nú reyndar lengi framan af von á því að Geir væri ekki einn af þeim, þannig lagað. Að Geir myndi frekar horfa í vilja þjóðar sinnar og fara út í breytingar í seðlabankanum í upphafi bankahrunsins, en mér skjátlaðist hrapalega - Geir er sannarlega tryggur skósveinn gamla harðstjórans með svipuna. Ótrúlegt að maður eins gáfaður og Geir - skuli hafa fórnað eigin frama sem og hagsmunum okkar - í blindum eltingaleik við sinn gamla meistara. En við hvað hefur Geir alltaf verið hræddur? Hvað er það sem Davíð Oddson hefur á hann - sem og aðra sjálfstæðismenn? Hvernig stendur á því að risastór flokkur af mismunandi fólki er eins og skjálfandi hríslur við fyrrum (núverandi) leiðtoga sinn. Er það furða að okkur er spurn...

Geir óttast sundrung og misklíð

Ástæða teiknimyndahausanna komin í ljós. Minn tími er kominn - aftur - Passið ykkur bara!

Ég er að segja ykkur það satt - það er búið að taka mig mánuð að komast að niðurstöðu - í endalausum samningsviðræðum - við mig og sjálfið mitt - um að mynda nýtt bandalag á milli "Tigers" og "Kennitölueiganda" þessa bloggs.

Niðurstaðan;

Tiger fær að halda áfram að blogga en nú verður kappinn bara í mýflugumynd á blogginu!

Hér er afturá móti komin skýring þess að kallinn hefur ætíð komið út eins og einhver teiknimyndafígúra. Málið er nefnilega að uppruninn er sóttur til Spánar þar sem götumálari málaði kappann á blað - en við hverja línu sem á blaðið fór - breyttist Tigerinn sjálfur meira og meira - alveg þar til hann var sjálfur eins og fígúra (sem hann hefur náttúrulega alltaf verið í raun og veru)! 

 

Ok, Tiger mun halda áfram að blogga eitthvað um stund.

Ég ætla samt ekkert að vera að spora á ykkur alls staðar heldur bara láta sjá mig þar sem uppákomur eru, t.d. afmæli, brúðkaup, ný vinna eða eitthvað sem má fagna. Ég komst nefnilega að þeirri niðurstöðu að ég var farinn að eyða of miklum tíma í að skrifa um allar tryssur og var það tími sem ég hefði betur eytt í hluti utan vefsins.

Svo vil ég þakka ykkur öllum sem sendu mér faðmlög í privat skilaboðum - ég hef ekki komið nema einu sinni á bloggið síðasta mánuð - og verð að viðurkenna að ég saknaði þess gífurlega í upphafi föstunnar en svo smá saman skildi ég hve alltof miklum tíma ég var farinn að eyða hér, tími sem ég bara á ekki til að eyða svona.

En, bíðið bara .. ég á eftir að vera harðari og orðhvassari en hingað til, verð ekki með sömu mýkt og sömu ljúfleikaviðmótin. Hjartað er og verður þó enn á sínum stað..

Over and out of here now ..

Hinsta kveðjan! Í upphafi skal endirinn skoða - en hér er upphafið skoðað að leiðarlokum.. *sakn-sakn*! Gleðilegt nýtt ár og þakka bloggvinskap og lestur og ljúfleika á árinu sem er að hverfa á braut - ásamt Tiger!

Það eru komin óflýjanleg tímamót - jú - sannarlega áramót, en líka önnur tímamót hjá nafnlausum, litlausum og frekar hlutlausum bloggara - bloggara sem er eiginlega hálfgerð teiknimyndafígúra, só tú spík...

Nóttin er að færast yfir hann!

Hann kom hér fyrir margt löngu - byrjaði á því að lesa í Jenný Önnu Baldursdóttur, einn af vinsælustu bloggurum Mbl.is. Eftir einn lestur þar byrjaði hann að lesa fleiri bloggara - og svo fleiri og aftur fleiri - og á endanum gat hann ekki rifið sig frá Mbl.is bloggsíðunni.

Mörgum mánuðum eftir að hann byrjaði að lesa blogg Mbl.is ákvað hann að skella inn í bloggkerfið kennitölunni sinni - og gefa þar með Mbl.is öruggan aðgang að persónu sinni - og fullan aðgang að ábyrgðarmanni þeim er ætíð hefur staðið hreinn og beinn að baki því sem viðkomandi bloggari sendi frá sér.

Hann ákvað að kalla sig Tigercopper í upphafi en breytti því síðar í Tiger. Hann byrjaði á því að byggja sér "Vegg" í anda uppáhaldsbloggara síns og í einhver fá skipti "kastaði hann sér í vegginn að tarna" ... hann lagði af stað í ævintýraheim bloggsins þann 24 janúar 2008!

Þegar hann byrjaði að blogga var hann í smá vandræðum - lítill í sér og feiminn við að blogga í fyrsta skiptið og hleypa fullt af ókunnum inn í líf sitt og sinna. Hann hafði aldrei bloggað áður - en hafði samt verið virkur og duglegur penni á öðrum vettvangi á netinu - en það er önnur Elínborg - eða já - var það önnur Ella?

Samt lét hann vaða þar sem hann gat hleypt af stokknum bloggi sem hann sannarlega bar ábyrgð á - og sem hann ætlaði sannarlega að standa undir og axla ábyrð á - enda búinn að senda mikilvægustu upplýsingarnar til Mbl.is - kennitöluna sína sem sagði "eigendum" bloggsvæðisins nákvæmlega til um hver og hvar hann væri - og hvern ætti að taka í gegn ef honum yrði á í bloggferð sinni á veraldarvefnum!

Hugurinn leitaði mikið, vel og lengi - en hann vissi alls ekki hvar og hvernig hann átti að byrja að blogga - vissi ekkert um neitt í raun og veru þegar hann ýtti fyrsta blogginu af stað. Í byrjun ætlaði hann að vera á pólitísku nótunum - en hann hafði samt aldrei skipt sér neitt sérstaklega af pólitík og var reyndar voðalítið pólitískur í sér - nema hvað hann var langt frá í hrifinn af "Landspabba" og hans gamla alltof rótgróna ósjálfstæða flokki ..

Tiger ákvað fljótlega að honum leiddist að vera á pólitískum nótum - enda hafði hann alls ekkert vit á pólitík í raun og veru. Hann ákvað því snemma - eftir sirka níu færslur og aðeins tvær athugasemdir (önnur þeirra hans eigin) að hætta pólitískum nornaveiðum og fara úr pólitíkinni sem slíkri - enda Halloween löngu liðin tíð ... og pólitíkin leiðinleg tík sem slík!

 

Hann fann sig mun betur í húmor, léttleika og ljúfmennsku - enda var það svo mikið hann sjálfur - inni við beinskrattann var það í hans eðli að reyna að gleðja, kæta liðið og vera eins væminn og hægt var - með það í huga að fá aðra til að brosa, glotta eða bara hrista hausinn ... hann lagði af stað með sjálfið sitt í fararbroddi og hefur gert það núna út árið 2008 með 273 færslum í það heila.

Tiger hefur þó ætíð haldið fast við að vera "blörraður" - vera bara Tiger og ekkert annað..

Stundum fékk hann þó einkaskilaboð frá ljúfum og kátum bloggurum sem bentu honum vinsamlega á það hvernig aðrir bloggarar gætu auðveldlega náð nafninu hans fram þó hann væri ekki með það á síðunni sinni.

Einn ljúfur bloggari óskaði meira segja eftir því að Tiger samþykkti bloggvináttu sína - eingöngu til að geta sent honum þessi skilaboð um að nafnið má finna auðveldlega þó það væri ekki sýnilegt öllum ..

Ýmislegt misjafnt poppaði upp á síðunni hans Tigers. Allt frá því að vera bara ótrúlegur aulahúmor - uppí það að vera væmnustu hjartans færslur um sína yndislegustu ættingja og vini - enda virkilega ríkur bloggari þar á ferð hvað vini og ættingja varðar.

En, Tiger eignaðist líka góðan hóp af nýjum vinum þegar hann fór af stað í bloggheimum - en þó hann hafi í upphafi ákveðið að setja ekki á síðuna sína svokallaða "Bloggvini" - vegna þess að hann hafði lesið áður einhvers staðar að bloggvinir væru svo miklir tímaþjófar - þá leið ekki löng stund áður en hann áttaði sig á að bloggvinir eru nauðsynlegir til að verða sýnilegur á blogginu - lítið grunaði hann að þessi viðbót varð að hluta af lífinu sjálfu og lestur bloggvinanna varð .. jú að tímaþjóf .. en algerlega ómissandi þáttur í rútínu þegar á netið var farið!

Margir og ótrúlega yndislegir bloggvinir poppuðu upp og margar yndislegar sálir birtust í gegnum blogg vinahópsins.

Minnistætt er þegar hann rakst á "gamla vinkonu" í blogghópnum á Mbl.is - okkar ástsælu dásamlegu Bibbu á Brávallagötunni, en Tiger var sko nágranni Bibbu á .. Brávallagötunni - og var leynilega virkilega skotinn í kerlunni yndislegu! Hún var þó ekki hin eina sanna Kanelsnúðanágrannakona - það er allt önnur Elínborg!

Margir aðrir mannvinir komu uppá yfirborðið þegar Tiger fór að sækja sér bloggvini - og áður en langt um leið voru ljúfir bloggarar líka farnir að senda bloggvinabeiðni til hans - sem hann sannarlega samþykkti með gleði.

Minnistæðir bloggarar - að öllum bloggvinum ólöstuðum og ónefndum - eru t.d. hin sterka og einstaka Ragnheiður. Í styrkleika hennar fann Tiger part af sjálfum sér og sorg hennar og missir snerti hann mikið þar sem Tiger hafði sjálfur misst ýmislegt smátt og stórt í gegnum tíðina. Missir Ragnheiðar varð að ómissandi heimsóknarferðum Tigers á kertasíðu sonar hennar, Hilmars - og eignaðist Tiger góðan vin í þeim engli - vin sem ekki mun týnast þó Tiger verði ekki lengur á meðal okkar hér á blogginu!

En eins og sagði þá voru bloggararnir mismunandi sem birtust í bloggvinahóp Tigers. Margir ótrúlega yndislegir púkar skutu upp kollinum - púkar sem alls ekki týndu sér í endursköpun nýrrar íbúðar - púkar sem prökkuruðust um allt - með heilt eldhúsgólf í fanginu - týndu reykháfum, fóru í sturtu með kisu að morgni dags á meðan aðrir sváfu - og púkar sem byrjuðu jólastússið löngu á undan sjálfum jólasveininum ..

Já, Tiger eignaðist yndislega bloggvini sem margir hverjir endurspegluðu hans eigin lífssýnir. Jákvæðir og ljúfir bloggarar sem létu sér málin varða, hlúðu að hver öðrum og sýndu mikla manngæsku og samúð sem og virðingu í ljós öllum stundum ...

Í þeim hópi voru t.d. Jónína dúa - Ásthildur - Steingrímur - Milla - Jenný - Ragnheiður - Brjánn boxari - Huld - Emm - Solla - Helga Blekpenni - Heiða Boníta - Guðrún B - JógaMagg - JEG - Ásdís - Tína - Maddý - Huxa - Hneta - Búkolla - Majaogco - Lillagud - Ofurskutlan - Skjolid - Sigro - Rasan - Brynja - Antonia - Linda - Skattborgari - Strumpurinn - Egvania - Icekeiko - Wonderwoman - SillaGunna - Yederupdrottningin - Hrannsa - Ruslana - Bláskógatinna - Ace - Agny - Formosus - HeidiHelga - Katla - og síðast en ekki síst nýjasta bloggvinkonan hans - bloggarinn með fallega nafnið - Rósalín Alma.

Omy good hvað hann var heppinn með bloggvini - því það er ekki bara þessi upptaldi hópur sem var hvað yndislegastur - heldur allir hinir líka - bæði sýnilegir og ósýnilegir - því það voru þessir bloggvinir allir sem gerðu það að verkum að hann hélt áfram að koma - aftur og aftur  ...

Hvern og einn bloggvininn gat hann séð fyrir sér sem brilljant eitt eða annað - og eitthvað gott sá hann í þeim öllum, enda úrvalshópur sem ekki kallaði allt ömmu sína - töffarahópur sem gustaði að þegar eitthvað stóð til og hópur sem gerði ýmislegt til að létta öðrum lundina eða til að veita styrk eða gleði í erfiðleikum - nú eða til að hlægja með öðrum og samgleðjast á afmælum, þegar fæðingar stóðu yfir eða þegar einhver fékk nýja vinnu...

En svona er lífið. Stundum gengur allt sinn vanaveg en stundum taka hlutirnir beygjur og þá er oft eitthvað sem verður til þess að óumflýjanlegir hlutir rúlla af stað.

Þessi tímamót - áramótin 2008/2009 - eru einmitt þannig tími.

Nú er að líða að lokum hjá Tiger - hann er að hverfa á braut þess ókunna og er þetta hans allra síðasta færsla - á Mbl.is! Augu hans eru full af tárum og hjarta hans grætur bloggvinamissinn - og sendir hann hér með sína síðustu kveðju yfir netheima með þakklæti fyrir ómetanlegar stundir sem hann átti með sínum dásamlegu bloggvinum - sem og öðrum bloggurum sem hafa lagt leið sína ósýnilegir um pistla hans!

Að lokum er hér ósk Tigers um Gleði og hamingju ykkur öllum til handa á nýju ári! Megi guð og gæfa vaka yfir ykkur öllum á komandi ári - og megi hamingjan umvefja ykkur öll - alla daga!

 

Gleðilegt nýtt ár kæru bloggarar nær og fjær - bæði bloggvinir og aðrir bloggarar sem þetta lesa. Þið eruð það sem heldur blogginu uppi - þið eruð það sem fær mann til að nenna að blogga yfir höfuð!

Over and out - áður en höfundur springur af væmni!

Aðeins eitt stendur alltaf uppúr í lok hvers árs hjá mér og minni fjölskyldu allri - móðir mín/okkar er ennþá hjá okkur öllum - í fullu fjöri og ekkert fararsnið á henni ... er hægt að elska manneskju meira en þetta!?

Yndislegasta mannvera jarðarinnar á afmæli í dag!

Myndin af henni er hér - að vísu örlítið gömul mynd en samt "óblörruð" - en dálítið óskýr. Þessi mannvera er höfuð og herðar stórs hóps af fólki sem er bæði ungt .. yngra og kornungt! Ef þið komið til með að rekast á hana í dag - þá bið ég ykkur vinsamlegast um að taka hana í faðminn og knúsa hana 1001 - rétt eins og í ævintýrunum - enda er hún algert ævintýri kerlan! 

Auðvitað er þetta mín dásamlega móðir!

       

Hún er mikill mannvinur þessi kona, hrein og bein hetja líka. Alein stóð hún uppi rétt rúmlega þrítug með sex börn - það elsta þá líklega tólf til fimmtán ára eða svo. Hún vann myrkranna á milli og lagði á sig allar heimsins byrgðar til að halda saman barnahópnum sínum - bað aldrei neinn um hjálp og lenti aldrei í skuld við einn eða neinn heldur óð áfram knúin elsku á börnum sínum og viljanum í að missa engan frá sér.

Málið var að oftar en ekki tók hún vinum og vinkonum okkar barnanna opnum örmum og hlúði að þeim eins og væru þau hennar eigin - vísaði aldrei neinum frá og var stundum með ungt vinafólk okkar hjá okkur á jólum eða páskum eða á þannig stundum.

Henni fórst allt vel úr hendi sem hún réðst í - reykti ekki og drakk ekki - og gerir ekki ennþá - veitti sjálfri sér aldrei neitt heldur setti allt sem henni tókst að draga í búið - til barna og svo síðar barnabarna sinna.. og er ennþá að!

  

Hún er 66 ára í dag þessi elska - á uppkomin sex börn - yfir 20 barnabörn og langömmubörnin orðin allavega fimm og minnst 4 á leiðinni ... hún er moldrík kona skal ég segja ykkur!

  

Hún ól okkur öll upp þannig að við sýnum náunga okkar 100% virðingu, vinsemd og komum ætíð eins heiðarlega fram og kostur er! Hún sá til þess að við erum ófeimin við að tjá tilfinningar, knúsast og elska hvert annað .. við erum lítill angi af henni svo miðað við mig - getið þið sem lesið mig margfaldað hana!

Okok .. hér er ég farinn að hljóma eins og ég sé að skrifa minningargrein - en málið er að ég gæti skrifað heila bókaseríu um góðsemi og göfuglyndi hennar móður minnar. Hver veit nema ég geri það bara einn góðan daginn - enda hefur líf hennar verið mikið og undarlegt ævintýri þar sem bæði sorgir og gleði skiptast á ..

En, til hamingju elsku mamma mín! Þú ert heitt elskuð af mér - og okkur öllum systkynum, barnabörnum og barnabörnunum þínum öllum ..

  

Að sjálfsögðu skreytti ég færsluna með myndum af einhverjum kökum úr kaffihlaðborðinu hennar í dag - en reyndar hefur móðir mín aldrei haldið uppá afmælið sitt .. aðeins einu sinni fengum við systkynin leyfi hennar til að halda henni veglega veislu - en það var yndislegt.

Yfirleitt hefur hún bara bakað tertur og kökur og fleira - sem hún hefur bara á borðum allan daginn og svo bara líta þeir við sem eiga leið hjá. Auðvitað er dagurinn fullur af iðandi lífi og allur hópurinn hennar er að líta á hana allan daginn. Þessi dagur er einn yndislegasti dagur ársins í okkar fjölskyldu.

Knús og kveðjur á alla bloggvini mína og ég sé ykkur öll á morgun - þegar ég fer lokahringinn til að lesa ykkur og kveðja því Tiger er að fara ...