Burt með Valintínusarkjaftæðið - burt með ástsjúka fávita.

Nú hellast yfir okkur arfar og sælgæti sem og flóð af kampavíni, kavíar og ilmefnasull. Hvers eigum við að gjalda sem ekki erum í rómantískum hugleiðingum? Við sem erum kannski ekkert á því að láta klófesta okkur og gera útaf við hið ljúfa líf þess einhleypa  jamm, glætan að maður láti þetta vaða yfir sig á rómantískum skónum ...

 

Hérna eru 10 leiðir til að sleppa úr klóm þeirra sem eru á þeim buxunum að binda okkur niður, niður með hjúskaparmiðlara. Hugmyndir fengnar með því að útúrsnúa hugmyndum um "viltu giftast mér" í Fréttablaðinu í dag.

1. Eldaðu banvæna máltíð en vertu viss um að þú hafir hellt nóg í þann sem er að reyna að klófesta þig. Þannig áttar hann/hún sig ekki á Arzenik bragðinu fyrr en of seint og þú laus. (Alltaf hægt að nálgast Arzenik hjá Jenný okkar því hún hefur ætíð lausnir við öllum vandmálum).

2. Gefðu þeim sem þig vilja krækja í uppá "gott" nudd. Ekki vanda þig og einbeittu þér að svæðum og punktum sem valda sem mestum sársauka. Notaðu enga olíu því olíur gætu átt það til að valda unaðstilfinningu - notaðu ekkert - því þurrara sem nuddið er því sársaukafyllra er það. Áður en þú hefur náð að nudda inn öllum sársaukapunktunum mun klækjarefur ástarinnar vera búin að fá nóg og flýtir sér burt frá þér - og þú laus.

3. Skrifaðu niður alls skyns varnarorð frá "ímynduðum vini sem er að vara þig við ástinni" og límdu þá út um allt í íbúðinni áður en þú ferð heim með ástsjúka einstaklinginn í fyrsta sinn. Mundu að hafa orðin nógu særandi fyrir þá sem eru á biðilsbuxunum. Gott er að nota svona gula miða með lími - gætir fengið nóg af þeim t.d. hjá Jenný milljón. Þegar biðilsbuxarinn er búin að lesa nokkra miða með ýmsum óheppilegum orðum mun hann skilja málið og koma sér út - og þú laus.

4. Skrifaðu niður punkta um hvað þú ætlar að varast að gera með framtíðarmaka og hvað þú ætlast til af honum/henni. Settu miðana undir segul á ískápinn eða á spegilinn á baðinu eða þar sem þú veist að gullgrafarinn mun örugglega sjá hann. Vandaðu orðalag ekki, notaðu fraza eins og t.d. "Verður að kunna að elda, vaska upp og skúra" - "Spara pening og ekki eyða í óþarfa eins og blóm, konfekt, fatnað, bíó/leikhúsferðir, ferðalög út úr myndinni" og slíkt. Sá aðili sem er að reyna að krækja í ferðafélaga og fyrirvinnu mun skilja að þú hafir ekkert slíkt í huga heldur vanti þig bara ráðskonu/mann sem mun einbeita sér að því að þér líði vel og ekkert annað - þú losnar auðveldlega hérna.

4. Taktu flesta konfektmolana úr konfektkassa og borðaðu þá á meðan þú setur neikvæða málshætti í konfektkassann í staðinn. Mundu enn og aftur að láta neikvæðni stýra málsháttunum og láttu sem þú sért leiður - afsakaðu þetta og segðu að þetta hafi eiginlega verið ætlað öllum hinum stelpunum/strákunum sem þú ert að hitta meðfram henni/honum. Segðu að þú ætlir að reyna að losna við öll framhjáhöldin á næstu árum ef hægt er - þú sleppur vel hérna.

5. Kauptu auglýsingapláss í kvikmyndahúsi sem sýnir alltaf skjáauglýsingar áður en kvikmyndirnar byrja - vertu kominn hálftíma fyrir sýningu til að tryggja að refurinn/tófan á biðilsbuxunum sjái örugglega alla auglýsinguna og verði í þokkabót hálf leið/ur á því að hanga svona - mundu að kaupa miða á mynd sem er mjög léleg og hefur fengið mjög lélega gagnrýnisdóma. Auglýsingin ætti að innihalda nafn þess sem er að elta þig á röndum. Ef við köllum ástsjúka aðilan A: þá gæti auglýsingin verið á eftirfarandi hátt: "A, mér er flökurt - mig langar til að æla! Ég þoli ekki innilokun svo ég vona að þú leyfir mér að fá mitt space ef ég ákveð að leyfa þér að binda mig niður í hjónaband" - einni er þetta ágæt auglýsing: "A, ég elska þig ekki en kannski get ég lært það með timanum að hætta að umbera eltingaleik þinn og farið að elska þig raunverulega". Bless bless rebbi/tófa - þú ert laus.

6. Efndu til stefnumóts, reyndu að hitta á kaldan og dimman dag. Bryggjan kemur t.d. sterk inn þar sem sjáfarlöðrið skvettist yfir og bætir ekki á stefnumót í kulda og trekki. Segðu henni/honum sem hefur verið að gera þér lífið leitt með ástarjátningum og blómum - að þú ætlir að koma henni/honum á óvart með skemmtilegri siglingu. Vertu búin/n að sjá út lítinn opinn árabát sem er mjög kominn til ára sinna og helst lekan. Bentu á hann og segðu - "hér er smá hint um hvað bíður okkar í framtíðinni - þetta er snekkjan þín" - ljómaðu eins og þú meinir hvert orð og segðu svo að þú hafir gleymt því að hann/hún væri sjóhrædd/ur en þú munir vera fljót/ur að ösla þá heimsku úr honum/henni. Sjóhræddur einstaklingur fer ekki á sjó með þér í hriplekum litlum hálfónýtum árabát í köldu, dimmu og veðurmiklu veðri - þú ert undantekningalaust frjáls hérna.

 

7. Leigðu þér færan listmálara til að mála mynd af þeim ástsjúka. Mundu að semja við listamanninn um að hann máli þennan pirrandi ref í grófri mynd - mynd sem sýnir hann/hana mun eldri en rétt er. Láttu málarann setja inn á myndina lítil stykkorð sem segja hve mikill máttur listarinnar sé - að myndir ljúgi ekki heldur sýni raunverulegan sannleika. Sjáðu um að það verði hrukka hér og hrukka þar, láttu líka koma fram fýlusvip og flárátt augnráð. Gefðu svo biðilsbuxaranum myndina á næsta stefnumóti með þeim orðum að myndin segi allt sem þú hugsar og brostu sakleysislega um leið. Næsta víst að eigið egó hvers og eins um sjálfan sig - mun hjálpa þér að að losna hérna mjög fljótt og auðveldlega.

8. Semdu eigið ljóð. Hafðu það eins hæðið og kuldalega tómlegt og þér er auðið. Hafðu það langdregið og skreyttu það með alls skyns neikvæðum orðatiltækjum sem þú veist að eiga ekki við þann sem er að reyna að binda þig niður. Vertu leeeeeeeeenngi að lesa það og vertu glaður á svipinn allan tímann því þú veist best sjálf/ur hve rímlaus, laglaus og orðóheppin þú ert. Þegar afurðin er hálflesin muntu vera staddur í því að lesa fyrir sjálfan þig því hin love-sjúka manneskja þoldi ekki háðið og neikvæðnina og er farin - og þú frjáls eins og fuglinn - eyddu ljóðinu svo þú sökkvir ekki í þunglyndi yfir eigin verkum.

9. Farðu með þann sem leggur þig í ástareinelti til fjölskyldu hans/hennar. Gerðu í því að vera neikvæður og leiðinlegur við pabbann og farðu á trúnó við mömmuna - segðu henni frá öllum þeim sem þú hefur náð að komast yfir á undanförnum vikum og mánuðum. Gortaðu yfir því að vera æði og að allir séu að reyna að fá bita af þér - segðu að þú ætlir að hugsa þig um með hvort þú munir núna stoppa við og einbeita þér að dóttur/syni þeirra. Segðu að það verði erfitt og örugglega margar freistingar á ferð þinni - en þú ætlir að reyna að standast þær - en ef þú getir það ekki mun afkvæmi þeirra örugglega skilja það. Spurðu tilvonandi tengdaforeldra hvort það sé ekki öruggt að sonur/dóttir þeirra megi gista öðru hvoru hjá þeim ef til vandræða með framhjáhald komi upp því þú sért frekar laus í rásinni og eigir erfitt með að einbeita þér að einum maka í einu. Glottu og segðu þeim að þú ætlir að vona að þau sjái um peningahlið brúðkaups, skírna, ferminga og fleiri uppákoma í framtíðinni því þú hafir ekki hugsað þér að vinna of mikið sjálf/ur. Tilvonandi tengdaforeldrar þínir munu hér þegar hafa stoppað þig og þakkað þér fyrir innlitið. Dóttirin/sonurinn verði eftir hjá þeim núna og óþarfi að líta aftur við - þú laus og mundu þegar þau henda þér út að þakka fyrir matinn en segðu þeim að hann hafi verið frekar bragðlaus, rétt eins og afkvæmi þeirra. Hér ertu endanlega sloppinn.

 

10. Útbúðu vefsíðu/blogg með nafni hennar/hans. Settu alls skonar vitleysu, bull og kjaftasögur inn á síðuna og sjáðu til þess að hún/hann fái slóðina senda til sín. Mundu að láta mjög persónulega hluti inn á síðuna, eins og t.d. hluti sem hann/hún hefur sagt þér í trúnaði. Hugsalega eitthvað sem hann/hún gerði af sér, sagði um vini/vinkonur - ef þig vantar eitthvað krazzandi þá skaltu nota ímyndunar aflið til að klára restina. Segðu frá einhverjum neyðarlegum stundum sem engin kærir sig um að einhver fái að vita um, helst eitthvað sem grætir og særir. Hérna ertu laus án þess að þurfa að segja neitt - þú bloggaðir um það allt í hennar nafni.

Að þessu loknu þá ertu algerlega á eigin vegum til að fara á fjörurnar við hverja þá sem lenda á vegi þínum um ókomna tíð - enda örugglega mjög fáir sem hafa áhuga á því að vera í slagtogi við eins ljótthugsandi og særandi persónu eins og þig. Þú munt enda alein/n og engin mun ónáða þig um ókomin ár með einhverjum ástarþvælum og faguryrðum - eitthvað sem gott er að vera laus við - ekki satt?

Gleðilegan Valintínusardag og megi óbragðið fylgja þér í framtíðinni - framtíð einmannaleika og fúlmennsku. Ég er farinn að kaupa blóm og eitthvað ljúft í matinn fyrir kvöldið. Ilmefnin eru á baðkarsbrúninni og heitt vatn verður komið í áður en elskan kemur heim í kvöld. Hef skipt á rúminu og gert heimilið hreint. Ég mun eiga dásamlegt kvöld í kvöld því ég ákvað að hundsa eigin ráðleggingar og vera Valintínus í kvöld. Takk fyrir.

Athugasemdir

[Brynja skordal, 14.2.2008 kl. 16:04]

Frábært blogg gaman að lesa takk fyrir mig

[Adda bloggar, 14.2.2008 kl. 16:51]